У разгары падрыхтоўка да паездкі прадстаўнікоў дзелавых колаў Брэстчыны  ў Бадэн-Вюртемберг (Германія).

Напрыканцы чэрвеня  тут пройдзе  Эканамічны форум з удзелам нямецкіх бізнесменаў і рэзідэнтаў “СЭЗ “Брэст”, вытворцаў, прадпрымальнікаў нашай вобласці.

Як расказала галоўны спецыяліст аддзела знешнеэканамічных сувязяў адміністрацыі СЭЗ “Брэст” Наталля Гурда, з зямлей Бадэн-Вюртемберг брэстчан звязваюць даўнія сувязі. На прайшоўшым у верасні мінулага года ў Брэсце першым інвестыцыйным форуме былі і прадстаўнікі таварыства па развіцці межнароднага супрацоўніцтва, створанага пры міністэрстве эканомікі гэтага нямецкага рэгіёна, - “Бадэн-Вюртэтэмберг-інтэрнэшнл”. Тады бакі і дамовіліся аб  напаўненні супрацоўніцтва канкрэтным зместам. Брэстчане атрымалі запрашэнне у Германію.

Форум будзе доўжыцца два дні, брэстчане  пабываюць у Карсруэ, сустрэнуцца з кіраўніцтвам мэрыі, прадстаўнікамі гандлева-прамысловай палаты, бізнеменамі. У Штутгарце – адміністрацыйным цэнтры Бадэн-Вюртэмберга, у Доме эканомікі,  у рамках форуму пройдуць прэзентацыя інвестыцыйных магчымасцяў Брэстчыны, кантактна-кааперацыйная біржа, сустрэчы па інтарэсах.

Між іншым, чакаецца, што ў мерапрыемстве возьмуць удзел прадстаўнікі амаль 40 нямецкіх фірмаў, якія зацікаўлены у наладжванні партнёрскіх сувязяў з “СЭЗ “Брэст”, прадпрымальнікамі нашай вобласці.